Tháinig ceithre Bhallstát nua de chuid an Aontais, an tSeicia, an Danmhairg, an Ungáir agus Lucsamburg isteach in ALT-EDIC an 27 Bealtaine 2024. Bainfidh siad tairbhe as acmhainní comhthiomsaithe ALT-EDIC chun tacú lena n-éiceachórais náisiúnta Teicneolaíochta Teanga.
Tá 16 Bhallstát de chuid an Aontais bailithe le chéile anois in ALT-EDIC mar chomhaltaí agus tá 7 mBallstát ann mar bhreathnóirí.
Tá ionadaíocht ag an Liotuáin i gcuibhreannas ALT-EDIC ag an Aireacht Cultúir, institiúid rialtais atá freagrach as beartais chultúrtha stáit a cheapadh agus a chur chun feidhme i réimsí na n-ealaíon gairmiúil agus amaitéarach, na hamharclannaíochta, an cheoil, na mínealaíon, na pictiúrlainne, na músaem, na leabharlann, na foilsitheoireachta, an chóipchirt agus na gceart gaolmhar, agus i réimse chosaint na hoidhreachta cultúrtha agus na teanga.
Mar fhreagairt ar an dul chun cinn a rinneadh le déanaí in IS giniúnach, tá an Liotuáin ag féachaint go gníomhach ar fhorbairt samhlacha móra teanga (LLManna) agus ag tacú leis an éiceachóras don Liotuáinis. Chuir an Aireacht Cultúir tús le feachtas faisnéise chun páirt a thabhairt d’eagraíochtaí san earnáil phoiblí agus san earnáil phríobháideach araon in iarrachtaí ALT-EDIC. Tá roinnt cuideachtaí tar éis a spéis a chur in iúl cheana féin. Tá roinnt tionscadal á gcistiú ag an Liotuáin freisin tríd an tSaoráid Téarnaimh agus Athléimneachta (Next Generation Lithuania), arb é is aidhm dóibh acmhainní teanga a charnadh le haghaidh córais intleachta saorga. Táthar ag súil go gcomhlánóidh na tionscadail seo spriocanna ALT-EDIC.
Gaeilge